حكايه حلوة

حبيت أبتدي مشواري معكم بأول مشاركة لي بقصص كاملة علشان ما يصير حالكم مثل حالي انتظار مع طولت بال بعدين جنون وأخر شي مو مكتمله نقعد شهور والقصة ما اكتملت ( واحترامي لباقي الاعضاء والمشاركين )

*******
إن شاءالله تعجبكم ...

يالله نبدأ ... وابي تشجيع منكم ... اوكي

******


قصة قراره الموجه
للكاتبة / أنثى مغروره *


شخصيات القصه
بيت بوفيصل(عبدالرحمن) اكبر اخوانه عمره(55)سنه يمتلك شركة استيراد وتصدير مع اخوانه متزوج من ام فيصل (لطيفه) عندهم من العيال فيصل عمره 33 سنه متزوج من مها وعنده ولد اسمه عبدالرحمن عمره6 سنوات وبنت اسمها لطيفه وعمرها سنتين والولد الثاني من اولاد بو فيصل فهد عمره 25 سنه شاب فائق الجمال مغرور واللي في راسه بينفذه توه جاي من بريطانيا دارس ادارة اعمال وبعدين نوره عمرها 19 سنه سنه اولى جامعه قسم انجليزي بنت حبوبه واهم شي في حياتها الموضه . كادي عمرها 5 سنوات بنت صغيرونه وحلوه بس عيبها دموعها ماتنتهي كثيرة البكاء على اتفه الاسباب



بيت بو عبدالله (سلطان) اخوبو فيصل رجال عنده خير غني عمره 45 سنه شريك اخوه في الشركه متزوج من منيره , منيره انسانه طيبه لابعد الحدود في الثلاثين من عمرها ماجابت منه الا ثلاث بنات بعدين توقفت عن الولاده لاسباب غير معروفه على الرغم من ان الله منعم عليهم الا ان المال مانفعهم في العلاج ياما حاول بوعبدالله انه يعالج زوجته ولكن مشيئة الله اكبر وبناتهم هم مشاعل عمرها 20 سنه تدرس ثاني جامعه في جامعة الملك سعود قسم نبات عيونها واسعه وسود شعرها ناعم ويميزها ابتسامتها البريئه اللي تجذب كل من يناظرها واللي زايدها جمال وجود شامه صغيره تحت شفايفها وهي بنت تحب تهتم بنفسها انيقه لابعد الحدود وتهتم كثير بمظهرها الخارجي وهي دلوعه وفيها نسبة غرور والبنت الثانيه نوف عمرها 18 سنه تدرس في صف ثالث ثانوي بنت جمالها ناعم ويميزها سواد شعرها ونعوته بنت مرحه لابعد الحدود . والبنت الثالثه جود عمرها 14 سنه آخر العنقود وطلباتها اوامر دلوعة العايله


بيت امتعب الاخ الثاني لبو فيصل له ثلاث سنوات من زواجه متزوج بنت عمه العنود وعنده بنوته صغيرونه اسمها رند عمرها سنتين



منصور عمره 25 سنه عازب جذاب ومرح مهندس ويشتغل في شركة اخوانه ولا فيه احد قادر يسلم من تعليقاته ومقالبه
وباقي الشخصيات بتعرفونها من خلال الاحداث


في الشركة
بوعبدالله( قاعد يرتب الاوراق):- هاه منصور انتهيت من تصميم المشروع
منصور:- لاباقي اللمسات الاخيره كلها يومين بالكثير ونسلم المشروع
بوعبدالله:- تسلم والله يااخوي انت لو الله يفكك من العزوبيه كان انت مافي مثلك اثنين
منصور:- اصلا ومن قال انه فيه مني اثنين
بوعبدالله:- اقول بس عن الهرج الزايد وقم بس معي البيت ترى البنات مأ ذيني ماأجي الا وانت معي
منصور:- سوري مااخذت معي موعد
بوعبدالله:- لاسوري ولالبناني قم بس قم
منصور:- هههههههه خطير والله بوعبدالله يعرف ينكت
بوعبدالله:- قليلا مما عندكم هههههه
وطلعوا من المكتب واتجهوا للبيت


صوت الام تنادي بناتها :- يابنات ابوكم في الطريق تعالوا نجهز الغدا
جود:- انا يمه اعذريني اصغر وحده وحطي همتك في الكبار
نوف:- مصير الصغير يكبر يالله قومي امي وهي كبرك متزوجه وحامل بالمهبوله مشاعل
مشاعل:- مالهبل الا وجهك واحترمي اختك الكبيره وعنادا لكم ماراح اجهز السفره مع امي
الام:- حسبي الله على شيطانكم وهذا حالكم كل يوم كانكم متفقين على هوشه قبل الغدا علشان ماتجهزون السفره محسوبين علي بنات
مشاعل:- يمه ليه الخدم موجودين زيادة عدد حللي رواتبهم خليهم يجهزونها
الام:- مايصير يجهزونها وعمكم جاي على الغدا
بلهفه ردت مشاعل( مشاعل اقرب وحده لعمها منصور) أي عم يمه
جود:- من غيره اللي كل يوم اربعاء عندنا اكيد عمي منصور هو اللي لاحسيب ولا رقيب
نوف:- والله احسن واحد مااحد متمتع بحياته مثل عمي
الام:- هههههههه مااسمعك ابوك كل يوم يزن فوق راسه اعرس وهو مهوب راضي
مشاعل:- والله ياحبني له لاجل عين تكرم مدينه
الام:- اجل قومي خلصيني بدل هالهرج
واتجهوا البنات والام يجهزون السفره




في بيت بوفيصل
فهد:- يمه يمه
ام فيصل:- وش فيك تزعق خير انشاء الله
فهد:- الخير بوجهك يمه كل خير طبعا دامك امي وابوي عبدالرحمن
ام فيصل:-ماورى هالكلام الزين الا مصيبه
فهد:- افاا يمه ماهقيتها انا فهد ولد ام فيصل تجي مني مصايب
ام فيصل:- خلصني قل وش عندك ولا بقوم
فهد:- ماعندي شي بس ولهت عليك يالغلا حرام ؟
ام فيصل:- لا مهوب حرام بس الظاهر ماعندك سالفه اقوم اشوف الغدا ابرك لي الحين يجي ابوك والغدا ماجهز
فهد:- افااااااااا يمه ماهقيتها منك هذا بدل ماتقولين ما تولة علي غالي يا وليدي بس معلوم انا ولد البطه السودا مهوب ولدك
ام فيصل عطت فهد نظره وتوها بتقوم الا............
فهد:- الا يمه وش صار على الموضوع؟
الام:- انا قايله ان وراك بلى أي موضوع؟
فهد:- الفلوس اللي بتاخذينهم من ابوي عشان بسافر للشرقيه مع ربعي
الام:- وين راتبك معقوله ماعندك فلوس في حسابك
فهد:- وش رايك اقصر على نفسي تبين ربعي يقولون ولد بوفيصل اقل من غيره
الام:- قالوا ولا ماقالوا انت وش عليك منهم
فهد"بنظرة جد":- يمه انا اتكلم جد
الام:- بفاتح ابوك في الموضوع على الغدا واذا مارضى ابوك ماراح اعطيك الا 3000
.........:- السلام عليكم
ام فيصل +فهد:- وعليكم السلام
بوفيصل:- هاه ياام فيصل وشعندك مع هالولد
ام فيصل:- تعال جيت بوقتك
فهد بصوت خفيف:- لو طري مليون كان جاني
بوفيصل:- اجل لو طاري مليون يافهيد
فهد:-هههههههههههه و يقوم يحب راس ابوه ماشاء الله عليك يبه كل شي شايب فيك الا اذانك ردارات مهيب اذان
ام فيصل:- بسم الله على بوفيصل توه شباب وش ودك فيه يافهيد
فهد:- اجل وش رايك يايبه مدام امي قالت انك شباب تروح تعرس لك على وحده ثانيه ولاحظ انها شهادة معتمده من امي
بوفيصل:- هههههههههههه مهيب شينه بننظر في الموضوع ( قالها وهو يناظر في ام فيصل)
ام فيصل:-ماسوت علي من كلمه دام المساله فيها عرس لا بالله انت شايب شايب شايب
فهد:- ههههههههه الله الوالده قالتها بالثلاث من قلبها
ام فيصل( وهي قايمه):- هين يافهيد وتبيني اتوسط لك عند ابوك خلاص بروح احط الغدا ابرك
بوفيصل:- وش السالفه وش توسط وش خرابيط
فهد بكل جديه:- بصراحه انا ناوي اروح الشرقيه مع الربع ولازمني فلوس
بوفيصل:- ياولدي ماتلاحظ ان مصاريفك كثرت هاليومين جمع فلوسك بكره تعرس وتحتاج للقرش هذا اخوك معرس ومصاريفه اقل منك
فهد:-هاه يبه بتعطيني او لا؟
بوفيصل:- طيب والشغل ومن عطاك اذن انك تسافر؟
فهد:- يبه يومين ماهي بضاره والحلال حلالنا
بوفيصل:-امرنا لله كم تبي
فهد:- انت كريم وحنا نستاهل يابو فيصل
بو فيصل:- ههههههههه يعني يكفيك 5000
فهد:- توني اقول انك كريم وحنا نستاهل وتقول 5000
بو فيصل:-خلاص بحول لك اللي يرضيك في حسابك
فهد:- مشكور يبه ماتقصر




في بيت بو عبدالله
كل العايله مجتمعه على الغدا مع عمهم
مشاعل:- هاه عمي وش رايك في طبخي
منصور:- آآه بطني وانا اقول الاكل فيه شي اثاري انتي اللي مسويته بالله الاسعاف بسرعه
الكل:- هههههههههههههههههههههههههههههههههههه
نوف:- ماشالله عليها تعبت من الصبح وهي في المطبخ حتى الجامعه ماراحت
جود:- عمي اذا انت طبخت فهي طبخت
منصور يبي يعدلها لانه انحرج من اخوه:- من زود العسل اللي فيه خفت يرتفع السكر عندي فقلت اطلب الاسعاف احتياطا
بوعبدالله:- كانك جالس تتعدى على حقوقي
مشاعل:- هههههههه اموت انا على اللي يغارون
جود:- عمي ماشاء الله عليه ماشي يعوقه قلب كل الموضوع في مصلحته
وفي اثناء ذلك يرن جوال مشاعل
مشاعل:- هلا وغلا تو كنت معك في الجامعه مسرع اشتقتي لي
ساره:- مشكلة الثقه الزايده
مشاعل:- هاه خير وش بغيتي انا اتغدى
ساره:- الله وش غداكم خلي لي شوي
مشاعل:- ماتغديتوا
ساره:- لا راح ننتظر نايف
مشاعل ويدق قلبها:- ليه وينه
وفي هاللحظه منصور يناظرها بنظرات خبث
منصور:- من هو اللي وينه
مشاعل:- السواق
منصور:- متاكده
مشاعل:- عمي وبعدين البنت على الجوال
نوف بصوت واطي:-ياعيني على التصريف
ساره:- خلاص مشاعل بعدين اقولك وش ابي جا القاضي
مشاعل:- مع السلامه
وفي هاللحظه دخل نايف الصاله
نايف:- السلام عليكم طول الوقت ماتملين من هالسوالف؟
ساره:- وعليكم السلام اولا انا مااهذر عالفاضي وثانيا انا جالسه اكلم بنت خالتي
نايف فز قلبه وقال:- ومن هي
ساره بخبث:- وحده من بنات خالتي منيره
نايف واحمر وجهه:- مشاعل
ساره:- ايوه شاطر مشاعل
نايف:- شخبارها؟
ساره:- طيبه
نايف:- بالقطاره تتكلمين ابي اخبارها مهوب الموجز
ساره:- اسفه وش قالوا لك عني وكالة رويتز
نايف:- اقول ضفي وجهك والشرهه على اللي يقابلك وقومي حطي الغدا
ساره و كاتمه الضحكه :- انشالله
بيت الخاله موضي اخت منيره زوجها بونايف اسمه عبدالرحمن موظف في الغرفه التجاريه عندهم اربع بنات وثلاث اولادبكرهم نايف عمره 26 سنه وهو طيار وهو شاب جميل ووسيم لكنه مايوصل وسامة فهد وهو شاب طموح وبعده بنت( ساره) وهي اكبر البنات وصديقة مشاعل الروح بالروح ومعها بنفس القسم, زيد عمره 14 سنه في ثاني متوسط , جوري عمرها 4سنوات
===========================================
في شارع التحليه ستار بكس
فهد وربعه مجتمعين
احمد:- اجل بتفوزون على الطائي
ماجدوهو يفور دمه:- اساسا حنا مانبي الكاس لاننا في مرحلة تجديد
عبدالله:- اقول بلا مرحلة تجديد ابعد عوار الراس عنك وخلك مع...
فهد وهو يقاطعه:- اقول بلا كره بلا هم وش سويتوا مع السفره
عبدالعزيز:- انا احتمال ياشباب مااسافر معكم مقدر اترك اهلي
فهد:- مازلت مصر على هالعرس
عبدالعزيز:- لو علي ماعرست بس حكم القوي
احمد:-طيب اجل ننزل الشرقيه يومين وبعدين نحول للبحرين وش رايكم؟
ماجد:- طبعا اجل وش فايدة الدمام من غير البحرين
فهد:- بس لاتنسون الجوازات
عبدالله:- ننسى روحنا ولاننسى الجوازات
الكل:-ههههههههههههههههههههههههههههههههههههه
بيت متعب
متعب:- هاه حبيبتي جهزتي
العنود:- خذ بنتك وانا انشاء الله عشر دقايق واناعندك
متعب:- لاتطولين ياعمري لاني مواعد واحد من الشباب
العنود:- طيب بس ماقلت لي متى بنروح بيت اخوك بو فيصل
متعب:- والله مااتصلت عليه بس خليها الجمعه مره وحده نتغدى عندهم ونشوف الكل
( متعودين الاخوان يجتمعون كل جمعه على الغدا كل الاهل ولا احد يفوت هالجَمعه)

بيت بوفيصل
ام فيصل:- يلا فهد قم الحين بيصلون الجمعه
فهد:- يمه والله مانمت الا الفجر خليني ربع ساعه بعدين صحيني
ام فيصل وهي طالعه من غرفة فهد تقابل منصور
( ام فيصل راضعه منصور مع فهد وينام عندهم بعض الايام)
منصور:- صباح الخير يالغاليه
ام فيصل:- صباح الخير ياوليدي شلونك يمه؟
منصور:- بخير دامك بصحه وعافيه
ام فيصل:- وش فيك مارحت للمسجد هذا الامام جالس يخطب
منصور وملامح وجهه تعجب:- لاا والله ماشالله متى العرس
ام فيصل:- ههههههههه وش عرسة وش خرابيط الله يقطع شرك انا مدري من اللي المفروض يعرس اقول يمه
منصوروهو مبتسم:- سمي
ام فيصل:- رح صحّ فهد وروحوا صلوا عشان ترجعون بدري
منصور:- تامرين امر اصحيه واصحي ابوه
ام فيصل:- لامشكور لاتصحي ابوه بس صحه هو
منصور:- ههههههههههههه لاتقولوين انك تغيرين
ام فيصل:- اقول قم مدام النفس طيبه عليك
ويتجه منصور غرفة فهد وهو ناوي عليه نيه
دخل منصور غرفة فهد ويلاحظ انها ثلج
منصور:- حسبي الله عليك مهي بغرفه الاسكيمو
اخذ منصور كاس مويه بارده وعلى طول نادى باعلى صوته
منصور:- فــــــــــــــهـــــــــــــــــد وعلى طول يكب المويه على وجهه وهرب
فهد معصب وواصل حده:- اوريك يانصير مردوده
خلصت الصلاة واجتمعوا كل العوايل
مشاعل:-خالتي تبين اساعدك
ام فيصل:- لايابنتي هذا مها معي في المطبخ
مها تدخل الغرفه:-يابنات الله يعافيكم وحده تجي تجهز معي الاغراض
مشاعل:- اجل جيت بوقتي
ويتجهون للمطبخ
ميري (الخدامه):- ماما مها وين حطي انا هذا اكل
مها:- عطيه مشاعل توديه سفرة الرجال
مشاعل وهي تاخذ الاكل ومتجه لغرفة طعام الرجال
مشاعل بعد ماحطت الاكل:- كان السفره تحتاج للمسات ذهبيه
وتبدا مشاعل ترتب السفره
في مجلس الرجال
كل الشباب والرجال مجتمعين وفي هالوقت يرن جوال فهد ويطلع بسرعه من الغرفه ويتجه لغرفة الطعام علشان يكلم احمد
فهد:- اجل بكره
وهو رافع راسه وشاف مشاعل
فهد:- مع السلا........


وهذا الجزء الاول

وابي رايكم ترى مهم عندي
ولولاكم ما تشجعت

بحفظ الرحمن

مع السلامه

ابي ردودوكم الحلوة بليييييييييز ( يارب انالقصه اعجبتكم

شكرا مرة حلوه